چوتھی انٹرنیشنل پنجابی کانفرنس – "کِسان تے کِسانی"


لاہور وچ آج 28 جولائی 2026 نوں احمد رضا پنجابی دے دفتر وچ چوتھی انٹرنیشنل پنجابی کانفرنس دے سلسلے وچ اک اہم مشاورتی پنچایت منعقد ہوی۔
اجلاس وچ ایہہ گل متفقہ طور تے طے پائی کہ ایس وار دی چوتھی انٹرنیشنل پنجابی کانفرنس دا مرکزی تھیم "کِسان تے کِسانی" ہوئے گا۔ کانفرنس دا بنیادی مقصد پنجاب دے کِسان نوں عزت، پہچان تے طاقت دینا، اوہدے مسئلے سننا، اوہناں دے حل لبھنا تے زراعت نوں پائیدار ترقی دی راہ تے گامزن کرنا اے۔
اجلاس وچ احمد رضا پنجابی، پاکستان وچ ایگری ٹورازم تے زراعت دے معروف ماہر طارق تنویر، نامور پنجابی شاعر بابا نجمی جی سمیت سماجی رابطہ ذرائع نال وابستہ شخصیات، زرعی ماہرین تے پنجاب دی ثقافت نوں اگے ودھاؤن والے دوستاں نے شرکت کیتی۔
شرکاء نے اس گل اُتے زور دِتا کہ پنجاب دی اصل پہچان اوہدے کِسان، اوہدی مٹی، اوہدیاں فصلّاں، اوہدے بول، اوہدا لوک ورثہ، لوک گیت، میلہ، ثقافت تے اوہدی محنت اے۔ ایس لئی کانفرنس وچ کِسانی، زرعی معیشت، دیہی ترقی، نوجواناں دے کردار، پنجابی ثقافت، لوک موسیقی، ادب تے ورثے سمیت کئی اہم موضوعاں اُتے بھرپور مکالمہ ہووے گا۔
ایہہ وی فیصلہ کیتا گیا کہ 10 اگست 2026 نوں اک وڈا مشاورتی اجلاس بلایا جاوے گا، جتھے تمام سٹیک ہولڈرز، اداریاں، تنظیمیں تے متعلقہ شخصیات نوں مدعو کیتا جاوے گا۔ اوتھے کانفرنس دی باقاعدہ تاریخ، مقام، انتظامی کمیٹیاں، فوکل پرسنز تے مکمل پروگرام دا اعلان وی کیتا جاوے گا۔
شرکاء نے عہد کیتا کہ چوتھی انٹرنیشنل پنجابی کانفرنس صرف اک ادبی تقریب نئیں، بلکہ پنجاب دے کِسان، اوہدی مٹی تے اوہدے مستقبل نوں مضبوط بناؤن دی اک اجتماعی تحریک ثابت ہوئے گی۔
"جے کِسان خوشحال، تے پنجاب خوشحال۔ جے پنجاب خوشحال، تے پاکستان خوشحال۔"